Aduh... Nadai pengawa bukai

Tadi kawan aku siku bisi ngabas aku ke rumah. Lama enda betemu enggau ia. Udah mayuh cerita kami duai... nya ia madah siku aunty tu nanya nama kebuah aku lama enda ngagai *** ?(dirahsiakan) Udah nya mayuh agi cerita pasal aku disebut aunty nya ngagai kawan aku tu tadi.

Nya alai aku malas ka begulai enggau bala sida nya agi. Kelalu penyibuk. Suba agi aku sabar... taja aku nemu sida selalu berandau ke aku. Gari aku pen kala dirara sida sekali suba... Semua cerita aku ka ditemu sida.

Enda aku kisah ga tang ingin amai ati aku ka mantai agai sida gambar, ulah bala anak sida ke manah amat, ko jaku. Ka meda bakani sida nerima kenyataan...heh. Aku tu sigi jegit, nadai ngaga diri imun.

Gunung Kinabalu

Orang bukai kiruh ka ngintu Krismas... aku pulak kiruh niki gunung. Sigi enda sebaka enggau orang. Hahaha... Baru datai ari KK aku kemari..Tumu tinduk. Tengahari legi ka pulai ke Sarikei. Ko jaku ka ngintu Krismas ditu tang enda nyadi... Ba Sarikei aja meh aku tu... Chris, ila aku berunding nama digaga kitai ba rumah aku din.

Aku niki gunung 17-18 Dec nyin kemari enggau dua iku agi kaban. Patut 4 kami tang Mell enda ulih enggau laban cuti ia di cancel boss last minute... Nyau kembai mata tudah tuai bai nyabak.

Kami mupuk tumu pagi ari tiga ngagai Kinabalu Park. Udah berandau enggau Juki guide ti pemadu best.. ia madah manah agi kami niki ari Timpohon aja..enda ibuh ngena Mesilau laban ari ka ujan. Mesilau tu jauh agi jalai ia tang view manah agi.


Tu baru ja nurun ari Timpohon gate tang ngisin diri madah diri lelak... Hahaha....


Tu udah ba 5.5km... bisi 500 m agi ka niki agai Laban Rata. Udah ngeliah ari 4km aku bejalai 45minit setiap 500m. Duduk aja meh kerja... Bala kaban udah dulu ba mua tang Juki sigi setia nganti aku.. hehehe

Datai di Laban Rata kami makai lalu tinduk. Merus ngeli pen enda sempat...nama agi ka mandi. Kira jam 1 pagi kami sebuat digerak orang. Udah bepasuk ke baju celap, kami niki agai summit... Lembau ka cerita... Ila mantai ke gambar bukai.. Naka pengelelak.


Tu 200m ti penudi ka ngagai Low's peak...


Heh!!!!


Pulai... Orang bukai udah jauh ninggal ke kami sekaban tang kami agi ilek2 isap gam begambar... Kapa beguai pulai. Ukai selalu niki kitu.

Naka tu dulu. Ila becerita baru... Ka pulai ke Sarikei tengah ari tu legi. Drive kediri... kaban aku siku moto ia jai. Pagila baru ia pulai.

Deka Ngintu Krismas

Krismas? Christmas? X'mas? Kami sekaban suba kala dirara siku pastor laban ngena X'mas.. Ia nanya nama kabuah ngena X? Nama enda ngena Christ? Kati kitai ngangau ke Jesus Christ nya X? Kitai enda ngegala sapa Christ sampai kita ngangau ke ia X.. ko ia ngerara kami... tang jaku ia cukup lembut sampai dalam runding fikir aku nyentuk ke diatu.

Mayuh amat orang bebeli ke pun kayu Krismas ba pasar dipeda aku. Enggi aku lalu nadai siti pen. Laban diatu agi sibuk nginti ikan ba pegung sebedau ai bah. Hahaha... Udah nya ila enggau orang niki Gunung Kinabalu. Pulai ari KK baru meh aku tu ka berunding ke Krismas.

Krismas taun tu lain mimit ga ari taun ke dudi. Taun tu aku nyambut ba Kuching (Jen, Dara enggau bala ti bisi maca datai meh ke rumah). Aku perlu berjimat taun tu laban mayuh belanja dikena begaga ke dapur. Nya pen kabinet bedau ulih digaga...heh... Tang seingat aku tiap kali Krismas aku sigi nadai mayuh belanja iga... Baju pen nadai meli kadang-kadang. Enti sema bisi ngaga persembahan ba gereja lalu bisi baju ti perlu dibeli, baru aku meli. Enti enda, aku jarang ka bebeli ke baju baru. Belanja mina ba pemakai ke bala temuai... kadang-kadang bisi bbq. Udah nya bebeli ke hadiah ke bala.

Aku selalu ninga orang bejaku madah ke Krismas sida udu rami... mabuk datai ke taun baru. Nama runding kita? Nama tuju ke bendar kitai nyambut Krismas? Aku kala meh mabuk maya Krismas. Mabuk oren enggau panggang babi... Hahaha... mupuk aku.

Anak Mayau

Ari minggu kira ke dua minggu ti udah aku pansut bejalai enggau kaban meda wayang cerita Jimbun (James Bond). Pulai ari nya kami duai lalu pulai. Ia nganjung aku pulai ke DI. Enda mukai-mukai kawan aku nya brek lalu madah ke bisi mayau ba tengah jalai. Dihon ia enda ga mayau nya nginsit. Agi tinduk...

"Alai dik ngangkat ke mayau nya"
Aku lalu pansut ari moto ka ngangkat mayau nya ke tisi jalai...
"Ai... anak mayau tu, empat iku" .. ko aku lalu di bai aku ke tisi. Digiga aku indai sida ia nadai ga. Rumah orang pen nadai ti semak amat... Enda patut mayau tu lari.

Udah aku engkah ba tisi jalai, aku ka tama ke moto baru... sida ia lalu engkecit nitih ke aku.

"Bakani tu deh? " ko aku nanya kaban aku tadi tang jari udah nyengkau mayau tama agai moto ia... hahahah...

Datai ba rumah aku lalu begiga ke kutak endur engkah sida. Laban ke agi bedau teleba, lari meh sida tu tadi... kiau-kiau dipegai. Udah nya aku meri sida makai... enti kita kenyang, bisi orang ngempu kita tu, pagila anjung aku pulai baru, ko ati aku din.

Bendar amat sida empat makai... ia ga bulu nyau asai dawai...

"Bakani deh? Anjung nuan agai SPCA tu?" tanya kawan aku nya tadi.
Enda disaut aku. Agi berunding kenu ko...


Sida empat iku benung makai..kasih amai..

Pagi siti tumu aku dani meri sida makai. Udah bisi angat mimit ari lalu diberi aku mandi. Nyau coklet bilik mandi sida... Kira udah tengahari sida lalu nemu ka bemain enggau aku.

Dua ari udah nya kaban aku siku sms agai aku madah ia ka ngangkat dua iku anak mayau nya tadi. Senang mimit ga ati aku laban enti ngibun empat iku pedis amai ga. Enti aku sigi diau dia nadai ngawa. Aku tu lalu bedau temu penunga taun baru...

Pulai ke Sarikei ari dua tu kemari, aku mai dua iku... Terubah simpan dalam kutak. Udah nya digigit seduai ia kutak lalu pansut. Tang laban sigi udah diajar, seduai enda kemi enggau bira sebarang. Nyamai amat dijaga.

Datai di Sarikei, seduai lalu sakit. Dibai agai vet... nyau ga RM40. Ka meri vaccination, agi kelalu biak ko vet nya.


Gambar penudi sida empat begulai... sinu ngenang sida nyau beserara


Dua iku tu di bai aku.. ke bulu tiga diberi nama Sizuka. Ke oren Bubbles...

Blog Jaku Iban Keterubah???

Aku baru tebaca ke blog Puteri ti udah nyambut pengada ia ke 3 taun. Ba dia ia madah maya nya suba semina blog aku ti ngena jaku Iban, nadai dicampur enggau jaku bukai (bisi mimit)... kembai ga idung aku maca...

Tahniah ngagai semua blogger Iban... aram kitai sama ngangkat ke jaku kitai dalam blog... (semangat mimit kitai maca tu...alu ngangkat2 sepanduk..hahaha)

Asai aku kala aku nulis hal tu suba maya agi baru aku beblog. Ukai nadai kitai Iban ti ulih maca blog jaku Iban... Enda semesti ia kitai ngena jaku bukai (enggai ke nadai orang maca). Sapa madah blog jaku Iban nadai orang ngabas? Mayuh.... enggi aku dalam sari-sari datai 30 iku orang maca. Taja enda ulih ngelaban bala blogger bukai tang cukup meh nya... hehehe....

Aku tu berumban laban kami tu nadai karan enda lama agi... sampai jam 5 lemai... Merinsa amai. Mupuk dulu aku neh. Angat menua kami tu ditu enda baka ba menua bukai ti nyau bersalju... Naka penyelap kita din neh???

Mupuk aku... aram makai kemiding... hehehe

Mayuh Pengawa Diatu

Nadai ari aku ka update blog tu.... nama agi ka mempromo agai bala bukai... Awak ke lama agi, baru aku promo... kira ka keep low profile dulu.

Aku benung renovate rumah diatu. Nya kebuah aku nadai ari ka update. Lelak amat sepi aku. Laban aya aku ti ngaga, aku berapi ke sida. Ka ngasoh makai ba kedai, nadai sida tan makai chicken rice, prok rice, ekonomi rice berari. Aku pen sebening pala ngerunding menu kami tengah ari tu.

Mupuk dulu aku....

Aki Aku (ditulis 30 Julai 2005)

Minggu tu tadi kami sebilik dituntung penusah laban aki ti ngada ke apai aku nadai kena 25 ari bulan. Kami nadai nyangka ia jampat amat ninggal ke kami laban ta baru minggu nyin kemari kami bisi pulai ke rumah panjai... enggau bala betunu, bepansuh ka ikan pegung. Aku agi ingat niang enggai makai ngena pinggai kaca tang ka ngena pinggai tin ti dikena ia berari-ari. Gaga amat ia maia nya laban bala anak, menantu enggau uchu ia datai magang... udah makai betuggung ga bala ba ruai meda Konsert Akademi Fantasia. Beterauh meh bala lebuh maia meda konsert... ukai enda nemu ga pasal AF tu... ni ke nyukung, ni ke nganu...

Ko jaku, minggu tu ka betunu baru kami.... Amat meh bala datai magang tang timpang meh kami sebilik laban niang udah nadai agi enggau kami. Kekadang asai ke bisi nyawa ia bejaku ba dapur, ngasoh aku nganjung ai ke ruai... minta ambi ke gelas... Nya alai, agi ari ke terubah ia ninggal ka kami, aku sigi enggai tama ke dapur laban enti aku pulai ke rumah... kami duai niang sigi berandau ba dapur. Sinu amat ati aku ngenang. Bulan nyin kemari bisi aku meli sekelin ke bala petunggal lalu nyangkung seduai ia ini. Kumbai aku enggai seduai makai... peda aku nyingkau ga seduai laban enggai enda makai utai dibeli uchu.

Ia selalu amat nanya aku lebuh maia makai... "nama lauk nuan Umang?" lalu disaut aku "anuk". Maia aku agi mit suba sigi diau enggau seduai ia ini laban apai indai ti gawa ba menua ulu. Kenu ko cerita sida... maia agi mit, enti orang nanya aku baka nya... saut aku sigi belauk ke manuk belama taja pen makai ikan, jani, daun ubi. Enti nyabak rauh-rauh, ditanya orang ngetu meh aku dulu nyaut. Udah nya nyabak baru... amat tuyu ga pengawa maia agi mit. Nya alai, datai ke besai, udah gawa agi meh sida nundi aku.

Aki ngejang maia umur ia 75 taun. Ingat ndar aku maia makai selamat umur ia manggai 70 taun suba, bendar kami ngumbuk seduai ini besuap ke kek. Laban ke baru pindah ke rumah panjai, nadai TV seduai ini. Nya bala anak ia gerempung meli TV ke seduai. Maia kami ngasoh ia muka kotak... nya kami nundi ia... "ukai TV dalam nya aki, lampu picit aja kena di mandi malam" . "Lampu picit pama meh uchu" Enggai ke seduai kelalu boring meda TV1, TV2 enggau TV3 aja, maia aku meli moto suba, bisi diberi orang ASTRO pecuma, asuh aku pasang ba bilik seduai ia. Ngarap ke aki diau agi meh ba rumah, meda channel 50,51 enggau 52, enda 'segau-segau' ba kebun lada, madang getah.

Aki sigi bagas gawa... tumu pagi enggai enda enggau orang nurun nangkal. Taja bulih sekepin aja, enggai meh enda nurun. Lemai ke kebun lada. Ingat aku jaku ia ke bala anak uchu ia... "enti buruk dani pagi, takut ke panas, anang enda belajar bebendar kita ngambi ka bulih pengawa ti menyana, ulih dani laun, gawa ba bilik bisi ikun (aircond)". Nya sigi jaku peransang niang maia agi idup. Enti bala uchu ia buruk belajar sigi kena anu kami tu. Enti bulih pemutus peresa ti manah sigi "tu baru uchu aki", ko ia.

Aki enggai bepanggai ba bala anak uchu... taja pen bala anak udah kerja... ulih melanja seduai ini, aki agi ulih ngidup ke diri. Taja pen enda nemu ngena motosikal, aki meli motosikal kediri. Enda nemu ngena moto, aki meli moto tang enti ke pasar, nepan van tambang. Nya ngasoh kami sebilik geli ati enti ngenang aki ti bisi moto tang enda nemu ngena. Enti ditanya... "kapa meli moto deh aki?" "Kena aku raun," ko ia. Sigi amat ga... enti ia ka raun, ka nemuai ngagai bala uchu, nyamai amat ia... digiga ia aja sapa ti ka driba (drive) ke ia... Bala uchu sigi ka aja laban ka enggau ia raun.

Diatu aki udah nadai, sigi timpang asai kami sebilik. Nadai ga orang ka ditundi agi. Nadai orang ngambi ke kami ruas maia ka manduk pansuh. Nadai orang ngupak ke aku buah rian. Nadai orang minta aku maca ke ia surat agi lebuh pulai ke rumah. Enti ba menua diri empu, nadai ingat ke aki udah nadai tang lebuh maia pulai ke rumah panjai, dia baru berasai amat puang. Taja pia, kenang enggau aki sigi mengkang ba runding kami sebilik belama ia.

Enggau peluang tu aku ngari ke kami sebilik meri terima kasih ngagai semua bala ti udah meri bantu, bisi ngabas maia aki agi ba sepital lalu maia nyengai niang sari nya. Semina Tuhan ti ulih malas semua nya.


Raun enggau aki ba Pantai Alit (1986)


Mai aki raun ke Taman Gunung Kinabalu (2003)


Ari ke penudi enggau aki (28 Julai 2005)